आवेश पौडेल, बुटवल । बुटवलमा दिनदहाडै कुुकुरको टोकाईबाट सर्वसाधारणहरु पीडित बन्न पुगेका छन् । फाल्गुन २७ गतेदेखि गोलपार्कमा कुकुरको टोकाईबाट एकैदिन ४५ जना पीडित बन्न पुगेको प्राप्त तथ्यांकले देखाएको छ । सोही ट्राफिक चोकमा सावित्रा काइरालालाई टोक्दा हातको ठूलो नशा र मासुको भाग लगेर फ्याक्चर भएपछि लुम्बिनी प्रादेशिक अस्पताल बुटवलमा उनको गत आइतवार अप्रेसन गरिएको छ ।
घाइते बनेकी कोइरालाई कुकुरबाट छुटाउन खोज्दा उनका श्रीमान हरिलाल पौडेललाई पनि खुट्टामा टोकेको छ । बुटवल उपमहानगरपालिका वडा न-९ तिनकुने नजिकै मोति पथमा बस्दै आएकी दिना थापा मगरलाई चैत्र ३ गते सिद्धार्थ कटेज अगाडी दिउँसो ३ बजेतिर टोक्यो । दिनालाई उपचारका लागि लुम्बिनी प्रादेशिकको इमर्जेन्सीमा पुर्याएपछि बेहोससमेत भएको उनी बताउँछिन् । उनका अनुसार कुकुरको रंग खैरो बताइन् ।
सोमबार (चैत्र ५) बुटवल उपमहानगर वडा न-७ दीपनगरस्थित सिद्धेश्वरी लालकुमारी स्कुल अगाडि मोटरसाइकलमा सवार सुन्दर पाण्डेलाई देब्रे खुट्टामा टोकेको छ । इन्जेक्सन लगाउन अस्पतालमा आएका पाण्डेले मोटरसाइकल चलाएको बेलामा पनि आएर झम्टियर टोक्यो । बुटवलमा सडकमा हिँड्दा निकै जोखिम बढेकाले बालबालिकालाई झन चुनौति बढेको उनको भनाई छ । उनले आफुलाई सेतो कुकरले टोकेको बताए ।
बुटवलमा चैत्र ४ गतेसम्मको लुम्बिनी प्रादेशिक अस्पतालको एआरभी शाखाले राखेको विवरण अनुसार फाल्गुन २९ गते ४५ जना, चैत्र १ गते २० जना, २ गते ४५ जना, ३ गते ९२ जना र ४ गते २० जना गरी कुल २ सय २२ जनालाई कुकुरले टोकेको पाईएको छ ।
लुम्बिनी प्रादेशिक अस्पताल एआरभी शाखा इन्चार्ज तिलकराज गौतमले एकसाता यता गोलपार्कदेखि कालिकानगर, सुख्खानगर, दीपनगर र नयाँ बसपार्क लगायत ठाउँमा कुकुरले टोकेर इन्जेक्सन लयाउन आउनेहरुको भीड बढेको छ । यो हेर्दा निकै गम्भीर बिषय हो । इन्चार्ज गौतमले अहिले अस्पतालमा एआरभी इन्जेक्सन मौज्दात छ । केही समय धानिन्छ, तर यसरी महामारी जस्तै कुकुरले टोक्न थालेपछि अभाव सिर्जना हुनसक्ने भन्दै टोकेपछि तुरुन्तै इन्जेक्सन लगाउनुपर्ने सुझाए ।
प्रदेश स्वास्थ्य आपूर्ति व्यवस्थापन केन्द्र बुटवलका कोल्ड चेन निरीक्षक हरि प्रसाद आचार्यले माग अनुसार इन्जेक्सन नआएपनि हाललाई मौज्दात रहेको बताए । खासमा ५ हजार ८ सय चाहिन्छ, तर ५ हजार ४ सय आएको छ । तत्काल एकमहिनालाई पुग्छ, यस्तै बजारमा कुकुरको बिगबिगीले एकैदिन धैरेजनालाई टोक्न थालेपछि इन्जेक्सन अभाव हुने भएकाले सम्बन्धित निकायले कुकुर नियन्त्रणमा ध्यान दिन आग्रह गरे ।
बुटवल उपमहानगरपालिका भेटेनरी शाखाका पशु डाक्टर झविन्द्र बञ्जाडेले यो बर्ष बुटवल उपमहानगर-११ मा शिविर राखेर ३ सय कुकुरको बन्ध्याकरण गरेको बताउँदै कुकुर र बाँदरलाई व्यवस्थापन गर्नका लागि क्विक रेस्पोन्स टिम गठन गरी खोजीकार्यलाई तीव्रता दिएको बताए । उनले भने, हामीले नियन्त्रणमा लिएर देवदहस्थित रहेको कुकुर व्यवस्थापन केन्द्रमा पठाउने तयारीका साथ जुटेका छौं ।
तर उनले हालसालै कुकुरको टोकाइकाट पीडित बनेकाहरुको बारेमा भने नगरपालिकाको प्राविधिक टोलीले पुष्टी नगर्दासम्म बौलाहाएको होकी होइन् भन्ने यकिन गर्न नसकिने दावी गरे । यता लुम्बिनी प्रादेशिक अस्पतालका एक फिजिसियन डाक्टरले नाम नखुलाउने सर्तमा भने टोकाईको प्रकृति हेर्दा कुकुर कडा खालको छ, यो थ्रि डिग्री बाइट हो । हाई रिस्क हुन्छ । एआरभी सँगै इआर आइजी र एचआर आइजी पनि लगाउनुपर्ने हुन्छ ।
बुटवल उपमहानगर नगरप्रहरीसहित परिचालन गरिएको छ भन्ने उक्त टोलीले नभेटाएको कुकुरले मंगलबार बुटवल उपमहानगर वडा न-९ कालिका पथमा रहेको शिवालय मन्दिर अगाडि तिलोत्तमा नगरपालिका वडा न-१ का युनिस आलेको अनुहारमा डरलाग्दो तरिकाले टोकेको पाइएको छ । अस्पताल स्रोतका अनुसार घाउ ठुलो भएकाले अप्रेसन गर्नुपर्ने बताए । उनले थपे कुकुरको खेैरो रंग थियो ।
