आवेश पौडेल, बुटवल । पर्यावरणको संरक्षण र पर्यटकिय क्षेत्रको विकास गरी आन्तरिक एवं वाह्य पर्यटकहरु भिर्याउने उद्देश्यले स्थापना गरिएको तिलोत्तमा नगरपालिका वडा न १ र २ स्थित शंकरनगर वनबिहार तथा अनुसन्धान केन्द्र (वनबाटिका) को चौथो अधिवेशन शुक्रवार (हिजो) सम्पन्न भयो । अधिवेशनले नयाँ कार्यसमिति चयन गर्नलाई निर्वाचन समेत भयो ।
पर्यटन क्षेत्रको रुपमा विस्तार भई धेरै पर्यटनको रोजाईमा पर्दै आएको वनबाटिकाको नेतृत्व चयन गर्न दलहरुको चुनावभन्दा पनि कडा चुनावी मैदान भयो । नेतृत्व चयनका लागि संघसंस्थामा दलहरुको चरम हाबी भएका कारण चुनावसम्म गर्नुपरेको बुटवलमा केहीदिन यता देखिएको दृटान्तले देखाउँछ । केहीदिन अघि पारी बुटवलमा भएको खानेपानीको चुनाव, होटल तथा रेष्टुरेण्ट व्यवसायी संघ रुपन्देहीको भद्रसहमति तोडेर कार्यालयमा तालावन्दी र वनबाटिकाको नेतृत्व चयनमा सत्ता गठबन्धनका दलहरुको गठबन्धन र स्वतन्त्र उम्मेदवारबिचको लडाईले संघसंस्थामा दलहरुको हस्तक्षेप देखियो ।
पारी बुटवलको खानेपानी चुनाव र होटल व्यवसायी संघमा देखिएको दलहरुको दबदबाले कुनैपनि संघसंस्थाहरु व्यवसायीकहरुको र संस्थाको उत्थानका लागि नभई राजनीतिक गर्ने क्रिडास्थल बनाएको स्पष्ट देखिन्छ । जसले गर्दा न त व्यवसायीक संस्थाबाट व्यवसायीले संस्थाको गरिमा पाएको छ, न त कुनै संस्थाले स्वतन्त्रा पाएको छ । दलहरुको लुछातानीले संस्थाहरु बदनामी हुँदै गएका छन् ।
सो क्रममा वनबाटिकामा भएको निर्वाचनले दुई ठुला दलहरुलाई गतिलो सबक सिकाएको छ । दलहरुको दबदबाबाट माथि उठेर नागरिकहरुले आफ्नो स्वविवेक प्रयोग गर्दै दलका उम्मेदवार भन्दा व्यक्तिलाई हेरेर आफ्नो मत दिएको प्रत्यक्ष अनुभूति भयो । बाटिकाको नेतृत्व हातमा लिन भएको चुनावी मैदान निकै सरगर्मी देखिन्थ्यो । ताकी संघीय चुनावलाई बिर्साउने जस्तै । तर पनि सत्ता गठबन्धनलाई पछार्दै स्वतन्त्र उम्मेदवार खिमलाल पाण्डेले लोकप्रिय मतका साथ अध्यक्षमा विजयी हासिल गरेका छन् ।
अध्यक्षमा तीन जनाको प्रतिष्पर्धा थियो । पाण्डेले तीन सय ६९ मत लिए भने, उनका प्रतिद्धन्द्धी इन्जिनियर किरण खरेलले दुई सय ३४ मत ल्याएका थिए । खरेल एमालेका नेता हुन् । टीकादेवीले ३९ मत ल्याएकी थिइन् । उपाध्यक्ष पदमा चार जनाको भिडन्त परेको थियो । मीनप्रसाद देवकोटाले तीन सय ७८ मत ल्याएर गठबन्धनबाट जीतेका छन् । उनका प्रतिद्धन्द्धीहरु लेख बहादुर खड्काले एक सय ३२, चन्दा थापाले एक सय ९, हरिकला अधिकारी (कमला)ले एक सय ८८ मत ल्याएका थिए ।
सचिवमा दुई जनाको कडा प्रतिष्पर्धा भएको थियो । तीन सय ७९ मत ल्याएर बिदुर केसी स्वतन्त्रबाट विजयी भए भने, प्रतिद्धन्द्धी हिरामति थापाले जम्मा ५७ मत ल्याएकी थिइन् । कोषाध्यक्षमा तीन जनाको लडाईमा मनिराम भट्टराई तीन सय ८५ मतले जीत हात पारे भने, सौरभ भुसालले एक सय ७५, उदलसिंह थापाले ६३ मत पाए ।
लेखा समिति सदस्यमा विष्णुप्रसाद सुवेदीले दुई सय ११ मतले जीते, प्रतिद्धन्द्धी द्धय मीठुमाया पौडेलले दुई सय २, शंकर पाण्डेले एक सय ४८ मत पाएका थिए । सन्पिद भट्टराई तीन सय १३, लक्ष्मण मल्ल दुई सय १२ र विन्दु ढकालले तीन सय १२ मत ल्याएर लेखा समिति सदस्यमा विजयी भएका छन् । सरस्वती वरालले दुई सय ३९ र शंकर भण्डारीले दुई सय ७९ मत पाएर कार्य समिति सदस्यमा जितेका छन् ।
