आवेश पौडेल , लुम्बिनी । राष्ट्रिय प्रजातन्त्र पार्टीले बुटवलमा आज जनसभा सम्पन्न भएको छ । ‘अवस्था बदल्न व्यवस्था बद्लौं’ भन्ने नाराका साथ राप्रपा लुम्बिनी प्रदेशको आयोजनामा बुटवलको ट्राफिक चोकमा जनसभा गरेको छ ।
राप्रपा लुम्बिनी प्रदेश अध्यक्ष प्रदीप कुमार उदयको अध्यक्षतामा भएको सभालाई सम्बोधन गर्दै राप्रपाका संघीय सांसद तथा प्रवक्ता ज्ञानेन्द्र शाहीले प्रदेश सरकारको खारेजी र प्रजातन्त्रसहितको राजसंस्था पुर्नस्थापना गर्नुपर्ने बताउनुभयो ।
उहाँले दलहरुले गर्दा देश र जनताको अवस्था निकै गम्भीर मोडमा पुगेको बताउँदै अब अवस्था बदल्न व्यवस्था बदल्नुपर्नेमा सबै नागरिक सडकमा उत्रिनुपर्ने जिकिर गर्नुभयो ।
महामन्त्री धवल शमशेर राणाले अवस्था परिवर्तनका लागि व्यवस्था परिवर्तन नगरी देश र जनताको अवस्था सुदृढ नहुने भन्दै जनताहरुले निर्णायक निर्णय गर्नुपर्ने बताउनुभयो ।
राप्रपाका केन्द्रीय अध्यक्ष राजेन्द्र लिङ्देलले देशमा वर्तमान अवस्थामा व्याप्त विसंगति, विकृति र भ्रष्टाचार मौलाउँदै गएकाले राज्य नाङ्गो हुन पुगेको बताउनुभयो ।
ट्राफिकचोकमा गरिएको सभामा लुम्बिनी प्रदेशका १२ वटा जिल्लाबाट पार्टीका नेता–कार्यकर्ता तथा आम नागरिकको सहभागीता रहेको राप्रपा जिल्ला पार्टीले जनाएको छ ।
सभा हुनुअघि बुटवलको बसपार्क र लायन्स आँखा अस्पतालबाट र्याली निकालिएको थियो । बसपार्कबाट निकालिएको र्यालीको नेतृत्व राप्रपा केन्द्रीय अध्यक्ष लिङ्देन र उपाध्यक्ष विक्रम पाण्डे, र लायन्स आँखा अस्पतालबाट निकालिएको र्यालीको नेतृत्व महामन्त्री धवल शमशेर राणा र प्रवक्ता ज्ञानेन्द्र शाहीले गर्नुभएको थियो ।
