आवेस पौडेल,बुटवल । बुटवल–बेलहिया सडकखण्ड अन्तर्गत तिलोत्तमा नगरपालिकाको क्षेत्रभित्र पर्ने १३ किलोमिटर सडक यतिबेला ढकमक्क फुलेको बेगमबेलीले सौन्दर्यता देखाएको छ । वसन्त ऋतुको आगमनसँगै सडकका डिभाइडरमा फुलेको बेगमबेलीले सडकलाई आकर्षक बनाउनुको साथै यात्रुहरुको मन लोभ्याएको छ ।
चार वर्षअघि तिलोत्तमा नगरपालिकाले सडकको सौन्दर्यकरणका लागि भन्दै लगाएको ‘बेगमबेली’को ढकमक्क मनमोहक दृश्यले सर्वसाधारणहरुको ध्यान तानेको छ ।
चारलेन सडक विस्तारपछि तिलोत्तमा ५ नयाँमिलका एक व्यवसायी सुरज काफ्लेले आफ्नो घर अगाडीको सडक डिभाइडरमा दर्लाम महाकाली हरियाली पार्क नाम दिएर हरियाली बनाएपछि स्थानीय तथा केन्द्रीयस्तरका अनलाईन, छापा र टेलिभिजन प्रकाशन एवं प्रशारण भएपछि यसको लहर नै चलेको थियो । डिभाइडरमा फुल रोपेर हराभरा बनाउने कार्यमा लुम्बिनी नर्सरी गार्डेनका सञ्चालक रमेश पाण्डेले ‘बकमबेली’ लगायत विभिन्न प्रजातिका फुलका बिरुवा रोपेर एउटा अभियान नै चलाए ।
‘ग्रिन तिलोत्तमा, क्लिन तिलोत्तमा’ अभियान अन्र्तगत २०७४ सालमा जनप्रतिनिधि निर्वाचित भइसकेपछि अभियन्ताहरुले फुल रोप्ने कामलाई तीव्रता दिएका थिए । खरानीजस्तै देखिएको चारलेन सडकको ग्रिनबेल्ट अहिले हराभरा भइसकेको छ । तिलोत्तमा नगरपालिकाका नगरप्रमुख रामकृष्ण खाँणले ग्रिनबेल्टमा हुर्किएका फुल तथा रुख बिरुवाको संरक्षणमा विशेष ध्यान दिएका छौं । नगरपालिकाले ग्रिनबेल्टका विरुवा जोगाउन तारबार व्यवस्थापन र नियमित पानी सिंचाइ गरिरहेको छ । नगरप्रमुख खाँणले भने ।
‘ग्रिन तिलोत्तमा, क्लिन तिलोत्तमा’ अभियानमा हालसम्म दुई लाख भन्दा बढी वहुगुणी फलफूल तथा वनस्पतिका विरुवाहरु लगाएको नगरभित्रका सडक अहिले फूलले राताम्मे भएका छन् । नगरपालिकाले सिटी फ्लावरको रुपमा बेगमबेली निर्धारण गर्दै जन्मदिनमा कम्तिमा एउटा विरुवा रोप्न नगरबासीलाई आह्वान समेत गरेको छ।
