आवेश पौडेल, बुटवल । श्रम गन्तव्यका लागि पश्चिम नेपालका लुम्बिनी, कर्णाली र सुदूरपश्चिम प्रदेशका नागरिकहरुलाई पायक पर्ने ठाउँ मानिने मात्रै नभई पर्यटकीय दृष्टिकोणले पनि बौद्ध धर्मावलम्बीहरुका लागि आवतजावत गर्न सहज हुने विमानस्थल हो गौतमबुद्ध अन्तराष्ट्रिय विमानस्थल । विश्व शान्तिको मुहान लुम्बिनी आउने बौद्ध धर्मालम्बीहरु चाइना, जापान, थाईल्यान्डजस्ता देशबाट आउन सहज हुने विमानस्थलमा सोमवार (आज) देखि अन्तराष्ट्रिय उडान रोकिन पुगेको छ ।
गत कार्तिक २३ गतेदेखि एकसाथ अन्तराष्ट्रिय उडान शुरु गरेका फ्लाई दुबई, जजीरा एयरवेज, थाई एयर लाइन्सले गौतमबुद्ध अन्तराष्ट्रिय विमानस्थल भैरहवाबाट यही चैत्र १८ गतेदेखि नियमित उडान रोकेका हुन् ।
एसियाली विकास बैंकको ऋण एवं ओपेक फन्ड र नेपाल सरकारसहितको टर्मिनल र प्रशासनिक भवन निर्माणमा ७ अर्ब, उपकरण, एप्रोन लगायतमा २ अर्ब, हाल निर्माणाधिन साना ५ अर्बका योजना र शुरुमा तीन सय बिगाहा, पछि थप पाँच सय गरी कुल आठ सय बिगाहा जग्गा अधिग्रहणमा करिव ३६ अर्ब रुपैयाँ गरी झण्डै ५० अर्ब रुपैयाँ लगानी गरिएको देशकै दोस्रो ठूलो अन्तराष्ट्रिय विमानस्थल पुनः विजनेश विहीन हुन पुगेको छ । जनु अहिले विमानस्थलको अन्तराष्ट्रिय टर्मिनल सुनसान बनेको छ ।
२०७९ साल बैशाख ८ गते अन्तराष्ट्रिय उडान अवतरणका लागि सञ्चालन भएको गौतमबुद्ध विमानस्थलमा जेठ २ गते भव्य समारोहका साथ उद्घाटन गरिएको थियो । सञ्चालन भएको तीन बर्षसम्म विमानस्थलको उडान अपेक्षाकृत हुन नसकेको र जजीरा एयरवेजले एक बर्ष, हिमालय, नेपाल एयरलाइन्सले नियमित उडान गर्न नसकेको र गत कार्तिक २३ गतेदेखि एकसाथ उडानहरु भएका थिए ।
एकसाथ अन्तराष्ट्रिय उडानहरु गौतमबुद्ध विमानस्थलमा आउनु त्रिभुवन अन्तराष्ट्रिय विमानस्थलको मर्मत निर्माणकार्य भइरहेको र रातिको समयमा बन्द हुने भएकाले उडान हुन नसक्दा कतार एयरवेज, फ्लाई दुबई, नेपाल एयरलाइन्स, थाई एयर एसिया र जजीरा एयरवेजले सो समयमा गौतमुद्ध विमानस्थलमा आएर उडान भरेको आफुहरुको बुझाई रहेको गौतमबुद्ध अन्तराष्ट्रिय विमानस्थलका निर्देशक एवं प्रवक्ता श्यामकिशोर साहले बताए ।
निर्देशक साहले भने, अन्तराष्ट्रिय उडान भएको विवरण हेर्दा उडान राम्रै भएको थियो, यात्रुहरु राम्रै आवतजावत भएका थिए, यात्रुहरु पनि खुसी भएका थिए, तर अहिले उडान घट्दा असहज भएकोमा सम्बन्धित निकायहरुले विशेष ध्यानदिनुपर्ने बताए ।
विदेशी ऋणमा बनेको विमानस्थललाई सञ्चालमा ल्याई चलायमान बनाउन र विमानस्थललाई मध्यनजर गरी जिल्लामा पर्यटन क्षेत्रमा करोडौं रुपैयाँ लगानी गरेका निजी लगानीकर्ताहरु फेरी चिन्तित हुन थालेका छन् ।
चार महिनासम्म राम्रै यात्रुहरु ओसारपसार गरेका जजीरा एयरवेज र फ्लाई दुबईले शनिवारदेखि अन्तिम उडान छोडेको र नियमित उडान कहिले हुन्छ भन्ने टुंगो छैन् । अहिलेसम्म नेपाल एयरलाइन्सले मलेसिया भैरहवा उडान भर्ने तालिकामा उल्लेख छ । अन्तिम उडानमा शनिवार जजिरा एयरवेजबाट १५६ जना भैरहवा आएका छन् थिए, भने १६६ जना भैरहवाबाट कुवेत गएको विमानस्थलका सुचना अधिकारी विनोदसिंह रावतले जनाए । फ्लाई दुबईबाट ४२ जना भैरहवा आएका थिए । ३७ जना भैरहवाबाट दुबई गएका थिए ।
कतारको उडान पुसबाट रोकिएको थियो। थाई एयर एसियाले यही चैत्र ११ गते सम्म उडान गरेको थियो। सातामा ३ पटक कुबेत भैरहवा कुवेत उडान गर्ने जजिरा र दुबई भैरहवा काठमाडौं दैनिक उडान गरेका फ्लाई दुबईले उडान छोडेका छन् । विमानस्थल प्रशासनका अनुसार अप्रिलबाट अक्टोवर सम्म हुने समर सेड्युलको लागि एयर लाइन्सहरुले नागरिक उड्यन प्राधिकरणसँग अनुमती नलिएको र जसले गर्दा उडान कहिलेबाट हुन्छ भन्ने टुंगो नभएको बताईएको छ ।
