गगन पौडेल बुटवल, । काठमाण्डौंबाट दाङका लागि सोमवार साँझ साढे ६ बजे हिँडेका पुरन शर्मा मंगलवार विहान साढे ११ बजेसम्म अझैं घर पुगेका छैनन् । चैत्र १६ र १७ गते सम्पन्न प्रेस सेन्टर नेपालको ५ औं अधिवेशनका लागि काठमाण्डौं गएका शर्मा सत्र घण्टा बितिसक्दासमेत गन्तव्य पुग्न सकेका छैनन् । दाङदेखि चार सय ११ किलोमिटर दूरी रहेको काठमाण्डौंको यात्रा डेढ दिनभन्दा माथि लाग्ने भएको छ ।
अधिवेशनमा लागि दाङबाट काठमाण्डौं जाँदा पनि दाउन्नेमा रातभरी जाममा परेर हैरानी बेहोरेका शर्माले घर फर्किदा पनि त्यस्तै सास्ती खेप्नु परेको उनी बताउँछन् । बुटवल नारायणगढ चार सडक विस्तार कार्य अन्र्तगत दाउन्नेमा पहाड काट्ने र निर्माणकार्यले गति लिएका बेला ट्राफिक व्यवस्थापनमा कमजोरी र रात्रीकालिन बसका चालक र मालबहाक ट्रकहरुको ओभरलोडले बिच बाटोमा गाडी रोकिदा हुने जामले सर्वसाधारणहरुले निकै दुख पाएको पत्रकार शर्माले बताए ।
उनी भन्छन्, हिजो साँझ साढे ६ बजे हिँडेको हुँ, कति बेला घर पुगिने हो थाहाँ छैन् । सवारी चालकको मनोमानीले जाम बढाएको छ, यसमा ट्राफिक व्यवस्थापन चुस्त छैन् । सडक निर्माणले गति लिएपनि सवारी व्यवस्थापनमा सम्बन्धित निकायको ध्यान नपुग्दा नागरिकले दुख पाएका छन् ।
यता बुटवल काठमाण्डौं रात्री बसका चालक सोम गुरुङले कतिपय गाडी चालकले ओभरटेक गरेर अगाडि जाने होडले नै जाम पर्ने गरेको स्वीकार गर्दै मालबहाक गाडीका कारण सधै सास्ती हुने गरेको गुनासो गरे । अर्का सवारी लेखनाथ पोख्रेलले सवारीसाधन राम्रा भएपनि सडक र ट्राफिक जामले यात्रालाई झन्झटिलो दुखेसो पोखे ।
